Il Sportel Regjonâl pe Lenghe Furlane al è organizat di une Sede Centrâl e di cuatri Sedis Periferichis.

I servizis ufierts di ogni Sportel si riferissin in particolâr ae consulence linguistiche e ae traduzion scrite dal talian al furlan di tescj, cul obietîf di garantî l’ûs tai ents stes de lenghe furlane; la consulence su la toponomastiche in lenghe furlane pai ents che a vedin dibisugne di prontâ la cartelonistiche stradâl e insegnis in gjenerâl, e par garantî il plen rispiet dai toponims uficiâi stabilîts su la fonde dal D.P.Regj. n. 16 dai 13/02/2014; la informazion e l’orientament al public.

I servizis erogâts a son davuelzûts a pro di ducj i ents locâi, dai ents strumentâi e dai concessionaris di servizis publics includûts intes areis rispetivis dai sportei. Il servizi al è garantît ancje ai privâts, se stimât coerent cu lis liniis di politiche linguistiche regjonâls.

Il progjet di Sportel al è finanziât de Regjon F-VJ cui fonts de leç 482/1999 e al è rimetût ae ARLeF – Agjenzie Regjonâl pe Lenghe Furlane, tant che organisim competent pe sô gjestion.

Uficis

Par resons di sigurece e di prevenzion leadis ae emergjence epidemiologjiche in cors pal Coronavirus, su la fonde des disposizions emanadis in materie di bande des Autoritâts, si comuniche che il Sportel Regjonâl pe Lenghe Furlane al ricêf dome par apontament, telefonant o scrivint ai contats ripuartâts chi sot.